政情：黃傑龍「洗」碗 想做埋知客

食肆洗碗工作難請人，就連叙福樓集團執行董事黃傑龍（Simon）都要出動落舖頭洗碗？我哋喺社交網站見到一幅Simon洗緊碗嘅相片，原來佢上星期落舖頭幫手洗碗，想話親身了解公司運作之餘，又可以同員工交流意見。瞓過劏房嘅「窮富翁」Simon坦言，雖然所謂洗碗只係將碗碟放入洗碗機，但「洗」咗短短四小時，雙臂已經好痠軟頂唔順，冇幫倒忙已經算好了。經過今次「微服出巡」，Simon似乎上咗癮，笑言下次想試吓落舖頭做「知客」，親自招呼班茶客喎！