政情：炳良與錦樑 新倒霉孖寶
發展局局長陳茂波（Paul）同教育局局長吳克儉（吳得掂）上任後屢次捲入政治漩渦，堪稱倒霉局長孖寶。但時移勢易，佢哋嘅黑氣已「傳染」到接連「爆鑊」嘅運輸及房屋局局長張炳良同商務及經濟發展局局長蘇錦樑（Greg蘇）身上。其中張炳良更係「爆鑊停不了」，先爆出廣深港高鐵香港段工程延誤風波，而港鐵事故更係日日新鮮，佢同Greg蘇最近拍住倒霉，認真係難兄難弟。
新政府上任之初，Paul同吳得掂未坐得暖個位已經接連出事，其中Paul甫上任就捲入新界東北發展囤地風波，泛民主派議員當時窮追狂打，有議員更要求佢辭職了結事件，幸好風頭一過，總算避過一劫。至於吳得掂嘅「爆鑊」之最，一定係反國民教育風波一役進退失據，未有及時「拆彈」，更變相捧紅反國教嘅學民思潮，聞說部分親中人士至今仍對此心中有氣。
高鐵工程爆煲「炸傷」張
不過，此一時，彼一時，Paul同吳得掂暫別爆鑊「風眼」，最新倒霉局長孖寶取而代之就係張炳良同Greg蘇。先講張炳良，佢上月自我引爆高鐵延誤風波，港鐵延誤理由「賴天又賴地」，之後高鐵內部文件滿天飛，力證港鐵早知高鐵會延誤同超支，有議員三申五令要求港鐵高層全盤交代事件，否則不排除會使用《立法會（權力及特權）條例》調查事件。
同樣困擾張炳良仲有南丫海難事故內部調查報告，政府堅持以可能影響刑事調查為由，拒絕披露整份報告內容予海難死難者家屬，有家屬更直言由信任張炳良變為感到失望，睇嚟佢認真要快啲諗吓計「拆彈」先至得喇。
蘇「包容論」惹網民狠批
同張炳良難兄難弟嘅Greg蘇，佢去年十月先爆出免費電視發牌風波，及至今年初佢主責嘅旅遊事務又出問題，有反對內地個人遊嘅「驅蝗」行動、啟德郵輪碼頭被揭交通安排不善等「十宗罪」。而佢最新回應內地旅客隨處便溺嘅「包容論」，更激起網民強烈反彈不滿，最後惟有「補鑊」撰文指包容不等於縱容。究竟兩人幾時先可搣甩呢股倒霉黑氣，就要睇佢哋造化喇。