中環出更：仁濟新舊人 讚食齋好味
下周二就係佛誕，篤信佛教嘅仁濟醫院總理黃美斯（Macy）忙到氹氹轉，事關佢有份幫手籌辦「荃灣佛誕嘉年華」，希望散播正能量之餘，亦為仁濟醫院籌款。尋日Macy特登約埋仁濟醫院前主席李文斌（Edmond）及總理葉恭正（Paul），到荃灣一間有份炮製齋菜義賣嘅茶餐廳試食，無肉不歡嘅Edmond及Paul食到舔舔脷，猛讚原來素食都可以咁好味。
一直喺內地工作嘅Edmond，呢幾日趁五一假期返港，最近佢出任荃灣藝術節主席，依家忙於籌辦九月中登場嘅一系列藝術活動，仲忙過返工。阿Paul亦不遑多讓，佢近排為旗下賽車公司忙到周圍飛，日前啱啱返港，今日又再飛日本。不過，阿Paul係籌辦佛誕嘉年華活動嘅副主席，頻撲啲都冇計喇！
今次活動係由香港佛教聯合會主辦，荃灣西方寺承辦，仁濟係受惠機構，活動一連兩日喺荃灣沙咀道遊樂場舉行，除咗有綜合表演暨傳燈法會，佛誕正日仲有浴佛典禮暨嘉年華會，到時將有慈善義賣、素食及攤位遊戲等環節。
佛誕義賣 行「膳」積福
Macy話，今次區內好多企業及社團都出錢出力支持，包括某飲食集團幫手煮齋菜，仲有中醫骨傷科名醫進行義診，希望齊齊行善積福。
負責齋菜嘅飲食集團代表劉伯輝、劉榮民及行政總廚李葉安等人尋日齊出動，展示為義賣而設計嘅創意齋菜小食，包括香煎猴頭菇及冬蔭功湯米粉等，惹味好食，眾人齊讚食齋都唔係好辛苦啫！
卓妮