尾班西鐵駁唔到輕鐵

陳小姐早前乘搭港鐵西鐵線由紅磡返回屯門，原本打算在兆康站轉乘輕鐵615返回良景邨的居所，但下車後發現該輕鐵路線的尾班車已開出，「我搭尾二嗰班西鐵都駁唔到輕鐵，有冇搞錯！乜輕鐵唔係接駁港鐵嘅咩？」陳被迫改搭另一輕鐵線，在距離居所較遠車站下車，並在小路行走十多分鐘才能返家，「咁夜條路又靜又黑，有人匿埋咗都唔知。」陳希望港鐵延長輕鐵服務時間，保障夜歸居民安全。

港鐵：預留時間維修

根據港鐵網站的資料顯示，輕鐵線共有六十八個車站，乃屯門及元朗區內的主要交通工具，亦為港鐵提供接駁服務。西鐵乘客可於元朗、天水圍、兆康及屯門站轉乘輕鐵，但記者發現，大部分輕鐵路線均未能接駁西鐵尾班車，而能夠接駁的輕鐵線只會途經其中三十二個車站。屯門良景及建生一帶雖然有多個大型屋邨，卻沒有接駁西鐵尾班車的輕鐵途經。

港鐵發言人表示，制訂西鐵及輕鐵的服務時間時，需預留足夠的時間為系統進行維修保養，確保為乘客提供安全可靠的服務。輕鐵的服務時間由上午五時至凌晨一時半，可進行維修的時間只有三個多小時，若再延長服務時間會減少有限的維修時間。

區議員轟未兌現承諾

「其實遲多半個鐘收車，就可以方便到啲搭西鐵尾班車嘅乘客，但港鐵咁多年都唔肯做！」屯門區議會交通及運輸委員會委員李洪森批評港鐵未能兌現服務承諾，又指屯門良景及建生一帶有不少居民於市區上班，下班後無法轉乘輕鐵回家，除衍生不便外，更可能危及人身安全，「夜晚一點鐘冇車搭，要行返屋企，對女士嚟講真係好危險。」

立法會交通事務委員會委員陳恒鑌直斥港鐵諸多藉口，多年來罔顧新界西北居民安全，要求港鐵改善輕鐵的接駁服務，「輕鐵賺唔到錢，佢哋咪愛理不理，話唔夠時間保養根本就係藉口，唔會架架車都同一時間做保養，增加多啲人手都可以做得快啲！」

記者：楊育輝