政情：叻沙麵得獎 吳永嘉有眼光
向來識飲識食嘅中華廠商聯合會副會長吳永嘉（Jimmy），經常同友人分享飲食經，好似半年前開始，佢就不停向其他友人推介一款由新加坡出產嘅叻沙（Laksa）即食麵，估唔到呢隻麵被佢「推廣」後即得獎，最近有飲食網站公布全球十大即食麵排行榜，Jimmy推介款麵就名列第二位，估唔到佢除咗識飲茅台酒外，連食碗麵都咁有眼光。
Jimmy話，當初知道呢款叻沙麵存在，係去新加坡公幹時獲朋友推介，點知一試難忘，因為唔止麵質彈牙，湯底又有濃郁椰汁香，而且辣度適中，能夠吊起湯底嘅鮮蝦味，以一款即食麵嚟講，絕對係超晒班，所以佢每次去新加坡都係一箱箱咁買。
佢仲記得，當時香港冇地方有得買，搞到佢每次都要飛去新加坡入貨，但唔知點解佢推介完呢款麵後，最近連某連鎖超市都入埋貨，睇嚟呢款即食叻沙麵會愈來愈多港人喜愛。