政情：民望插水四議員
立法會議員每月穩袋逾八萬元人工，一舉手一投足都被市民用顯微鏡仔細觀察，邊個闖禍好快就從插水式民望反映出來。香港大學民意研究計劃最新民調顯示，民主黨（白鴿黨）何俊仁（AV仁）、工黨李卓人（阿人）、公民黨梁家傑（袋巾傑）及民建聯譚耀宗（譚Sir）四人評分，紛紛跌至議員生涯新低，淪為「四個插水的中年」，其中AV仁更勁跌九點一分，跌至三十九分歷史新低點，原因相信佢個花名已經解釋清楚喇。
睇自己友絕食 阿人齋叫喊
港大上月底至本月中以電話訪問約千名市民，結果曾鈺成、葉劉淑儀繼續蟬聯第一同第二，但數評分谷底就非AV仁莫屬。AV仁自二月底喺立法會聽財爺宣讀財政預算案演辭期間，偷睇水着索女艷照被斷正後，「法號」從此由「鐵頭仁」改寫為「AV仁」，多年來辛苦建立嘅專業形象連帶民望齊齊插水，排名僅高於梁國雄（長毛），認真羞家。
雖然阿人冇學AV仁睇艷照，但佢上月打鑼打鼓吹雞發起泛民主派普選絕食團，動員十七個自己友無限期絕食，但自己就捧住個大肚腩喺隔籬吶喊助威。可惜，絕食團由開始到結束都得唔到大眾關注，莫講話向政府示警，令市民、支持者大失所望，感覺唔知為乜，阿人今次跌二點三分、排名第六係可以理解。
傾政改衰扭擰 袋巾放飛機
至於袋巾傑就肯定衰「扭擰」，早前全體議員到訪上海傾政改，袋巾傑因為長毛攜帶「六四」物品入境被拒返港而發難，臨時決定唔飛上海，同身處上海嘅三位黨友「一黨三立場」各自飛，同上機前話要同中央溝通嘅承諾相違背，扭扭擰擰難怪跌至○六年上榜以來新低點。建制派唯一「插水」代表有譚Sir，無端端跌二點六分至九四年新低，插水原因無從解構，唔通今鋪「躺着也中槍」？