政情：中環出更：盛事屢變醜事 林健鋒難免落台
盛事基金近年多次捲入爭議，最新一次係被審計署踢爆成效不彰，基金評審委員會主席林健鋒（Jeffrey）更被批評監管撥款不力。由於Jeffrey任期將於今年六月屆滿，理論上未超過不成文嘅「六六規定」，即不超過同一公職六年任期，以及同一時間加入不多於六個委員會。但連串風風雨雨後，即使Jeffrey有心想收拾呢個「爛攤子」，相信呢個主席位都係冇得留低居多嘞！
難辭其咎 未必再獲延任
翻查資料顯示，盛事基金於○九年設立，原意係金融海嘯出現後「激活」本港旅遊業。同年Jeffrey被委任做主席，為期三年，即至二○一二年六月屆滿，之後Jeffrey再獲延任主席多兩年，直至今年六月中屆滿。
不過，就喺Jeffrey任期屆滿之際，基金就畀審計署「萬箭齊發」批到體無完膚，據聞外界要求有人為此孭鑊，其中首選目標係Jeffrey同另外五名委員，因為佢哋由基金成立至今已獲委任。然而一旦Jeffrey離開主席一職，究竟邊個願意喺風高浪急之際成為基金「新掌舵人」？就要睇下有冇有心人迎難而上嘞！
卓妮