政情：中環出更：廠商會青委為龍舟賽特訓
唔少市民都趁一連四日嘅復活節假期外遊，但中華廠商聯合會青年委員會一班兄弟姊妹，尋日未天光就走去赤柱扒龍舟。事緣佢哋喺嚟緊嘅端午節，將連續第三年參加赤柱龍舟賽嘅公開男女混合賽，記得去年佢哋僅以零點一秒之差三甲不入，只得「梗頸四」，眾人事後都覺得相當唔抵，所以今年廠商會青委一眾領導不敢怠慢，早於比賽前兩個月就集齊人腳，展開特訓，希望今年有獎落袋，為踏入八十周年嘅廠商會添一份賀禮！
廠商會青委尋日喺主席張永鴻，以及六名副主席吳景瀚、顏明秀、劉子芸、黃浩鈞、林蘭詩同王詩雅（Celia）等人帶領下，一大清早就到咗扒龍舟勝地赤柱正灘集合熱身，卓妮亦有到場湊熱鬧，見到班青委扒龍舟時齊上齊落，節奏同速度都有一定水準，睇得出佢哋真係下過苦功。擁有逾六年扒龍舟經驗嘅領隊兼教練胡子岐分析，各位隊員平日因工作太忙，缺乏運動，必須喺體能方面加以提升先至有勝算。
誓攞獎賀會方大壽
多名女副主席落力投入特訓，除咗想攞獎，另一原因係希望借扒龍舟減磅美容。其中Celia透露，好多人以為女仔扒龍舟會搞到對手粗晒，又擔心曬得多好容易會出雀斑，但其實多做運動有助身體機能加快運轉，有助減磅之餘，連皮膚都可以靚啲。
為咗賀廠商會八十大壽，一眾青委成員早前已絞盡腦汁，幫手度橋拍片做賀禮，又喺八十周年晚會上表演壓軸歌舞，認真搏盡，如果今次扒龍舟可以攞埋獎，咁就真係完美嘞！三軍未動，糧草先行，見到一班年輕人咁支持個會，據聞廠商會會長施榮懷與多名副會長，亦一如以往咁喺背後出錢出力，資助佢哋嘅一切飲食同其他經費開支，但落場扒龍舟呢啲粗重嘢，都係留番畀班年輕人嚟喇！
卓妮