政情：「關」顧非洲童 義賣咖啡抗瘧疾
非洲地區落後，傳染病普遍，在當地平均每六十秒就有一位非洲兒童死於瘧疾，疫情極度可怕。國際青年商會香港總會會長關俊華（Johnny）將發起「Nothing-But-Coffee」行動，計劃籌款十六萬元，用以購買蚊帳送到當地，以預防瘧疾蔓延。
籌款買蚊帳
Johnny上任商會會長三個月，香港青年問題及非洲疫情都係佢關注焦點。Johnny話，去年出席巴西里約熱內盧舉行嘅聯合國會議時，驚覺非洲瘧疾疫情一發不可收拾，所以佢希望喚起港人關注，結果獲一間咖啡公司捐出二千杯咖啡，五月將發起義賣咖啡行動，希望籌集十多萬元善款，購買大批蚊帳予非洲東海岸的馬達加斯加小孩，阻擋瘧疾迅速蔓延。
除咗籌款，Johnny亦關注後生仔嘅前途問題，佢話如今手持博士學位都未必吃香，加上內地及新加坡畢業生齊拗手瓜，確係搵食艱難，佢正着手研究亞洲國家嘅教育制度，睇吓如何提升香港年輕新一代嘅競爭力。