中環出更：當年赴援建 WK將重回汶川
四川「五．一二」汶川八級大地震發生差唔多有六年，唔少香港工程師都有去災區援建，本來工程界立法會議員盧偉國（WK）去年都打算趁地震五周年前往當地視察，但點知去年發生「四．二○」雅安地震，所以就改去雅安同附近嘅蘆山。不過，WK仍然對汶川念念不忘，佢同一班工程師計劃今年六月去汶川一趟。
想「短短哋」飛法國
WK話，唔少曾經參與汶川重建嘅工程師，都有興趣想知道重建進展，而年輕工程師亦希望北上考察。不過，因應當地道路情況，安排接載車輛唔能夠太大，最多只能夠用一至兩架中型巴士，每部可接載二十幾人，即係考察團最多只能夠容許五十幾人出發。
早前WK提過話考慮趁復活節假期短短哋去個旅行，但原來係要飛足十幾粒鐘嘅法國。點解要去到咁遠？因為佢嚮往法國美食，而且購物又方便，好過英國多多聲喎。不過，立法會好快就展開預算案「拉布」戰，尋日又見佢上咗電台節目，莫非真係取消咗法國之旅？
卓妮