中環出更：茅台「嘉」「彬」趁低價掃佳釀
隨着內地吹起節約風，茅台酒價錢過去一年大跌三至四成，唔少識貨之人好似買股票咁趁低吸納，香港國酒茅台之友協會副會長吳永嘉（Jimmy）與青委會主任莊家彬（Albert），都加入搶購行列。Jimmy話，茅台愈平就愈要買，好過將來追貴貨喎！
早前卓妮去位於觀塘嘅茅台之友協會寫字樓開吓眼界，一行入去就有一陣酒香撲鼻。眼前百幾箱茅台，十足私人酒窖，原來係會員預訂嘅佳釀。Jimmy話，倉內呢批酒係因為某會員家中大裝修，暫時寄存喺會內。Albert就話，佢哋一向唔會幫會員存酒。不過卓妮見到現場唔少限量版珍藏，包括茅台酒廠為上海世博會出產嘅囍字茅台等，原來呢啲限量版靚酒只供協會作展示推廣之用，多多錢都唔賣。
莊家彬七歲嘗第一杯
講番飲茅台，Albert自爆七歲已飲第一杯。當時佢同爸爸出差，好奇之下連飲七杯，自此與茅台酒結下不解之緣。每次同朋友食飯，佢可以獨自飲晒一支一斤裝茅台，夠晒豪氣。
身邊好友鍾意用茅台酒浸冬蟲草，或者加入糯米飯或魚翅嚟食，Albert就覺得酒精濃烈度十足嘅茅台同雞尾酒最夾，口感既複雜又有趣。
要征服茅台先要了解其特性。Jimmy話，五月將邀請茅台酒廠專家到港，講解釀酒竅門及如何品嘗茅台獨有嘅「醬香」，年尾再帶隊考察貴州茅台酒廠。飲茅台，無分國界。愈來愈多駐港領事加入茅台行列，聽聞除咗韓國及日本領事外，英國同俄羅斯等領事，飲完都話頂呱呱。
卓妮