最新嘅審計報告揭示盛事基金亂批錢、報大數，行政混亂過春秋戰國。呢個所謂「盛事基金」先後獲政府注資二億五千萬元，話就話「以創造盛事、吸引旅客」來港，其轄下嘅旅遊事務署管理，共資助二十四項「盛事」，撥款九千七百萬元。
然而，果效成疑，譬如一項獲資助一千五百萬元嘅高爾夫球公開賽為例，二萬三千張門票，僅得百分之七公開發售，其餘均免費派送；據審計報告指出，共有九項盛事的主辦機構報稱未能按協議開發具特色的旅遊產品組合，吸引旅客專程來港的成效不彰。
此外，所謂創造就業一萬個，亦有篤數之嫌，阿哥，連四百一十名學童舞獅都列「受薪」，搞笑成咁，都咪話唔驚嚇！「削足而適履，殺頭而便冠」，盛事基金創造職位報大數，搵幼童表演充數，咁低B嘅伎倆都做得出，真係點到你唔服？
仲有呀，批錢更爽過財務公司嘅廣告，有個叫焦媛實驗劇團等四個劇團參與，獲二百五十萬元資助嘅「香港音樂劇展演」，並指活動有多筆開支未能提供收據證明……總之，啲數唔清唔楚，有關審批及主事者睇怕完全沒有按規則辦事，明顯求求其其，慌死納稅人啲錢花得唔夠冤枉；當今筍工，原來盡在盛事基金嘅管理高層！佢哋真係「錢多事少離家近，位高權重責任輕」！
照理，負責審批每項申請，應該通過仔細嘅審批程序，有規有矩，而審批嘅錢，既然每筆都成幾百萬甚至成千萬，更要小心去處理，認真去監管其果效，保證每筆公帑都用得其所！如果連開支都可以冇收據，試問「審批」之義何來！不如索性將舊錢拋出來，邊個搶到邊個着數喇！盛事基金做醜事，政府好應該徹查失職高層，找出紕漏，胡亂花公帑，點對得住納稅人呢！