政情：大仔獲麟兒 葉澍堃「升呢」
近兩月政商界頻頻傳喜訊，日前輪到賽馬會大董葉澍堃（Stephen）榮升首任爺爺，佢大仔瀚林（Hiram）同靚新抱Connie嘅愛情結晶於本周二傍晚喺養和醫院出世，重六磅十安士，母子平安。新任爸爸Hiram甜笑話，囝囝樣貌似足媽咪，佢既驚又喜，因為BB較預期提早三星期出世，令葉家上下大失預算。
負責改中文名
原來喺BB出世當晚，Hiram咁啱安排咗飛去外地公幹，而父母同細佬都唔喺香港，幸好BB趕得切喺佢上機前及時出世，最終可以陪太太見證人生中重要一刻。Connie就感恩話，呢個復活節認真奇妙。Hiram透露，囝囝英文名叫Christopher，至於中文名就留待爺爺返港後「操刀」喇。
究竟Stephen兩公婆去咗邊呢？原來佢哋喺BB出世前一日飛咗去中東遊埠。身在中東嘅Stephen笑笑口話，一到咗多哈，「蘇蝦」仔就出世，當然非常開心啦！而太座見到孫仔相片非常興奮，風趣話終於「升呢」、老了！