政情：政改要通過「基」不可失

料行舊路 向獨立派埋手

記得當年港府硬銷○七及○八年政改方案時，一開始就只想撬走泛民六票，以求「僅僅熟」通過政改，最後當然失敗而回。中央其後吸取教訓，喺一○年親自落場與多個泛民黨派談判，最終促成民主黨「轉軚」通過二○一二年政改方案，但該黨自此就不斷畀激進泛民狙擊，令佢哋喺多場選舉中失利。

為咗減輕「轉軚」泛民議員嘅選舉壓力，中央及港府最希望今次可以氹掂泛民三大黨，即民主黨、公民黨及工黨齊齊支持政改方案。而喺剛結束嘅上海之旅，三大黨扭擰一輪後，最終都各自派出最少兩名議員報團，一度令今次政改前景轉趨樂觀。不過，其後三大黨有人早走離團、有人臨場杯葛，令到有關方面大失所望，認為當初個如意算盤已難打響，可能要行返○七及○八年政改方案條舊路，轉向個別獨立泛民議員落手。

李莫湯梁 今鋪做「鐵膽」

消息指出，一向被視為「隱形」建制派嘅衞生服務界李國麟及資訊科技界莫乃光（Charles），以及講過寧願退黨都要爭取落實普選嘅公民黨湯家驊，能夠抵住壓力、堅持參與晒整個訪滬行程，可被視為有望支持今次政改嘅「鐵膽」。至於與Charles同屬公共專業聯盟成員嘅會計界梁繼昌（Kenneth），雖然並無參與晒整個訪滬行程，但有傳佢同Charles只係策略性分頭行事，以免咁快被人睇死佢哋遲早會「轉軚」。喺日前進行嘅財政預算案二讀投票，以及再之前嘅擴建堆填區撥款申請，Charles同Kenneth都喺泛民一片謾罵聲中雙雙投咗贊成票，令人覺得兩人「有得傾、靠得住」。

至於最後一票仲可以喺邊度搵呢？據聞有關方面仍寄望緊民協馮檢基，認為佢純粹因孭住泛民飯盒會召集人個包袱，先至喺今次訪滬中「扮激」，相信隨着召集人任期喺今年暑假後屆滿，阿基會回復理性。不過亦有意見認為，若民主黨今次企硬反對政改，阿基畀個膽佢都唔敢獨自轉軚，否則民協會成為激進派嘅唯一狙擊目標。