中環出更：廠商會80周年 成員瞓身演出
中華廠商聯合會（廠商會）年底舉行換屆選舉，會長爭奪戰一度風起雲湧，但近日有傳敲定由第一副會長陳淑玲（Shirley）接棒，風波終告平息。咁啱廠商會尋晚喺灣仔會展中心舉行八十周年晚宴，會長施榮懷率領一眾副會長及會董出席，當中包括早前傳出嘅會長熱門人選Shirley、第二副會長李秀恒及副會長顏吳餘英。不過，卓妮就唔多覺顏太同李秀恒有企埋一齊，只係各自滿場飛去同在場老友打招呼。
對於Shirley決定重新參與競選會長一職，顏太話好支持好姊妹Shirley嘅決定，兩人仲喺宴上開心合照，力證二人之間並冇芥蒂。
秀恒稱淑玲係會長好人選
至於對呢件事一直未表態嘅李秀恒，就首次表明自己並冇唔開心，仲話Shirley都幾好，係一個好好嘅人選咁話，尋晚佢同Shirley仲有握手添！至於Shirley嘅堂哥、永遠名譽會長陳永棋就話，邊個做會長都唔緊要，大家都係一心想為廠商會出一分力啫。乜真係邊個做都冇所謂？
講番廠商會八十歲生日，一眾廠商會成員已經先後舉辦多項慶祝活動，重頭戲當然係尋晚嘅慶祝晚宴啦！晚宴除咗邀請高官出席外，一班廠商會成員仲齊齊表演，以話劇形式表達香港經濟喺八十年來嘅轉變。
負責籌備及撰寫劇本嘅李秀恒話，今次表演係大家花咗半年時間同心血去準備，表演成功真係感動到想喊，非常感性。此外，常務會董沈運龍及史立德、會董白富鴻及餐飲服務業行業委員會主席符策雄，就分別扮演當年嘅「四大天王」，相當搞笑。
卓妮