政情：烏龍傳錯短訊 盧偉國惹疑
使用智能手機程式WhatsApp溝通方便，但建立群組太多，就會花多眼亂，傳錯訊息可以好大件事，好似工程界立法會議員盧偉國（WK）就擺咗個烏龍喇。
叫建制為三堆一爐投票
話說立法會工務小組委員會尋日討論擴建將軍澳堆填區及興建石鼓洲焚化爐計劃撥款申請，喺會議開始時，WK就決定將政府有關「三堆一爐」嘅建議合併討論，喺表決時先至分開投票。不過，議員陳偉業（大舊）就認為，兩者係獨立嘅，質疑WK意在幫港府，做法偏頗。
就喺呢個時候，議員范國威就攞出手提電話，話上月召開環境事務委員會會議當日，WK就傳咗個訊息去秘書處開設畀全體委員嘅WhatsApp群組，短訊內容係：「今早要投票三堆一爐，建制派要夠人至得！」質疑WK主持會議有欠持平。大舊亦批評，WK作為工務小組委員會主席嘅公正性已蕩然無存。WK就反駁話，自己作為環境事務委員會委員，梗係有自己嘅立場，但依家作為工務小組委員會主席，就會好中立咁主持會議。