由三級歷史建築物前荷李活道已婚警察宿舍活化成嘅本地設計新地標「PMQ元創方」創意產業中心，今個星期開始局部開放。為配合建築物嘅歷史價值，元創方除咗將舊宿舍單位活現眼前外，仲播放咗一段由舊居民憶述當年生活嘅宣傳片，其中一位居民正係特首梁振英（CY）。不過，同樣係宿舍舊居民嘅「貪曾」前特首曾蔭權爵士就冇登場，唔通驚佢嘅貪腐醜聞影響元創方嘅形象？
元創方公關解釋，佢哋有邀請貪曾拍攝宣傳片，只係因為貪曾喺拍攝期間唔喺香港，所以無法成事。咁又係，貪曾嘅「貪盡海陸空、歎盡省港澳」貪腐醜聞臭名遠播，已變成過街老鼠，所以佢經常離港「潛水」，難得佢有自知之明，唔拍好過拍啦，以免破壞宿舍舊居民嘅美好回憶。
至於有份參與拍攝宣傳片嘅CY，喺片中身穿充滿懷舊色彩嘅MARK哥長大褸，親身到宿舍憶述佢細個嘅居住情況，佢形容當年宿舍單位細，食飯要喺走廊，一路食一路凍，但就好有人情味。另外，其中一個展覽廳布置成以前宿舍單位模樣，擺放酸枝長椅、衣車及印有當年紅極一時嘅前港姐狄寶娜摩亞肖像嘅年曆掛畫，營造昔日家居氣氛。