政情：慢必42歲生日「布」局失敗
立法會尋日恢復二讀財政預算案撥款條例草案，原本要開始審議由人民力量同社民連等多位議員提出嘅一千九百幾項修正案，但由於立法會主席曾鈺成未能處理大量修正案為由，決定喺官員發言同二讀表決後隨即休會，月底復會先至開始正式「拉布」。就係主席呢個決定，竟然令尋日生日嘅人民力量陳志全（慢必）大失所望，事關佢原先諗住以「拉布」度過四十二歲生日喎。
不過，慢必開完會後即時急急腳離開，原來同食物及衞生局長高永文及政治助理陳凱欣去金鐘一間西餐廳食晏慶祝，之後又喺議員辦公室同人力主席袁彌明、議員陳偉業等同事切蛋糕慶生。
剪布呼聲高 願望難成真
被問到今年有啲咩生日願望，慢必話希望主席曾鈺成唔好咁快「剪布」，等佢哋可以拉多陣布。不過，成班建制派議員尋日就高呼要求主席「剪布」，睇嚟慢必呢個生日願望都未必可以實現喇。