政情:自由黨區選大縮水

明年又到區議會選舉,大部分泛民主派及建制派黨派一早已作好部署,相信多數政黨都想擴闊版圖,派多啲人參選,點知自由黨就打倒褪,打算縮細選舉規模,決定只派十幾人出選,較上屆大幅減少。該黨作為中小型政黨,但竟然在一一年區議會選舉中派出廿四名議員參選,而且戰線分布全港五大選區,令人手資源調配極之困難,最終選舉輸到一仆一碌,莫非該黨經此一役嚇窒咗?定係有其他原因呢?

盡量唔內訌 寧對撼泛民

事隔近三年,自由黨當然想喺區選去得盡啲,但建制派有咁多政黨,議席又僧多粥少下,除非內訌同自己友爭位啦!該黨近年積極打造「曳仔」形象,已經腹背受敵,據聞該黨都唔想完全得罪「操盤人」,所以初步打算盡量唔喺建制派嘅選區搶位,主力與泛民票倉對撼或開闢新區出選。該黨亦決定唔再漁翁撒網,將資源集中喺十幾個中產選區,尤其主打港島私樓密集嘅中產區,希望力保本身議席之餘,亦能夠建立多幾個港島區樁腳。

大輝行得埋 可能幫到手

其實建制派內部除咗主要嘅大黨外,主打中產嘅新民黨冒起亦相當急速,頻頻在各區招攬現有區議員入黨,早前更與沙田地區政團公民力量結盟,令區議員人數增至三十一人,實力不容忽視。所以有地區人士分析,即使自由黨好似一一年區議會選舉咁派人四出參選辣火頭,相信只會重蹈覆轍,慘敗收場。

講到底,區議會選舉只係頭盤,二○一六年立法會選舉先係主菜。一直同該黨行得好埋嘅工業界林大輝,雖然仲未願意入黨,但最近雙方已有共識,會喺財政預算案撥款「拉布」戰時合作。按照建制派嘅不成文規定,每個黨喺「拉布」期間都要有一半黨友留喺會議廳,但自由黨只得五名立法會議員,就都最少要留三名議員喺立法會,如果加埋大輝就湊夠六人,既可以向建制派「交數」,亦可以多個人「輪更」,呢條縮數真係計得好盡。

第一手消息請下載on.cc東網iPhone/iPad/Android/Windows Phone Apps