中環出更：頭部生粉瘤 鄧家彪要「切」
立法會議員上星期去上海訪問兼討論政改，今次擺明係要建制派議員做人肉布景板，但同屬建制派嘅勞工界議員鄧家彪（Bill）就因為生咗粒大粉瘤而要做手術，因而避過呢項任務。話說阿Bill兩個星期前左邊後腦突然生咗粒大粉瘤，仲發到乒乓波咁大粒，醫生話佢頭皮毛孔閉塞，令皮膚分泌受阻，所以「谷」到咁大喎。
術後變「木乃伊」 嚇親囡囡
醫生於是開咗啲抗生素畀阿Bill，但佢食咗藥之後淨係止到痛，粒粉瘤就冇變細，搞到冇覺好瞓，所以就決定上周三做切除粉瘤手術。佢話，其實做完手術第二日已經可以出院，原本仲諗住可以如期上上海，但醫生提醒，萬一傷口受感染就麻煩喇，所以都係建議佢留港休息。阿Bill最後都聽醫生勸諭，向秘書處請假唔去上海，乖乖留喺屋企休息。
不過，最搞笑嘅係，阿Bill啱啱做完手術時，個頭包晒紗布，好似木乃伊咁款，搞到囡囡都畀佢嚇親喎。尋日佢去立法會開會，後腦仲貼住塊大紗布，睇落都幾礙眼。
卓妮