立法會一連兩日恢復二讀辯論財政預算案撥款申請，泛民議員再度預告會發動拉布戰。財政司長曾俊華（鬍鬚曾）尋日未開會就先呼籲議員唔好拉布，希望議員喺履行職責嗰陣，顧及政府同議會運作效率，令預算案撥款可以早日通過咁話。雖然鬍鬚曾睇落未有絲毫緊張，不過有消息話，港府下星期會叫各部門同公營機構檢視各自嘅現金流，同埋叫大家慳住使，希望捱得幾耐得幾耐。相信立法會拉布戰一日未落幕，鬍鬚曾都要勒緊肚皮度日喇！
