政情：撐老字號飯店 梁青華入股
香港近年租金飆升令好多老字號消失，彷彿經歷一場大洗牌，代代相傳嘅小城故事愈嚟愈難搵。香港鐘表業總會前主席梁青華（華哥）最近就入股老字號淮揚菜館雪園飯店，同飯店第二代蘇麗珊（Daphne）及蘇明德兩姊弟拍住上，為保留老字號出一分力。
華哥話，佢係食肆廿幾年嘅老顧客，佢哋高峰時期有六間分店，至今剩低銅鑼灣新寧道一間。不過咁多年來飯店菜式一直保持水準，又為香港培養咗一班江浙及上海菜師傅，冇理由唔支持。早排Daphne同佢提起入股，佢唔使多諗就應承。香港人一向識食，不過好似華哥咁捧場到入埋股，又真係唔多見。
兩年前因為父親過身而接班打理飯店嘅Daphne就話，店內唔少員工睇住佢大，大家感情深厚，連食客亦都係一代帶一代返嚟幫襯，令佢覺得應該堅持做落去。依家黑心食品充斥，食肆嘅誠信好重要，所以佢哋寧願穩步做好一間分店，下一步將吸引年輕食客幫襯，令佢父親苦心創立嘅事業可以延續落去。