政情：政商界二代 成立青年組織
正所謂「長江後浪推前浪」，近年香港各大親中社團、專業團體陸續成立青年委員會，打正旗號去做好人心回歸工作。最新動向係一班城中二代包括前全國人大常委曾憲梓兒子曾智雄及「玩具大王」蔡志明兒子蔡加讚（Karson）等人，帶頭成立香港政協青年聯會。到底葫蘆入面係賣咩藥，好快就會揭盅。
曾智雄 蔡加讚等帶頭
消息話，呢個新組織係由曾智雄出任聯會主席，Karson為聯會會長，至於副會長則有多名，其中較受注目係已故前全國政協副主席霍英東三子霍震宇嘅兒子霍啟智、「賭王」何鴻燊三太陳婉珍兒子何猷啟等，都係城中政商界重量級名門之後。
有政界中人話，香港政協青年聯會係繼香港青年聯會及菁英會等青年組織之後，雲集最多具影響力青年才俊嘅平台。佢哋喺政改諮詢首階段倒數一個月時成立，當中嘅政治意味不言而喻，下一步會否主打政改議題，大家不妨拭目以待。