政情：淑玲一出誰與爭鋒？
傳統四大商會之一嘅香港中華廠商聯合會（廠商會），今年十一月將舉行換屆選舉。不過早於今年初，會長之爭就提早引爆，皆因原本最有分量接棒嘅第一副會長陳淑玲（Shirley），因為想陪家人而唔想上位，結果副會長顏吳餘英急忙出嚟表態角逐會長一職，另一位副會長李秀恒隨後亦加入競逐，令會內氣氛十分詭異。不過今日唔知聽日事，一日未到選嗰日，一日都有變數。最新消息傳出，Shirley改變主意決定重返競選舞台，真係峰迴路轉。
「李顏之爭」 會董為難
我哋第一時間向Shirley求證，佢承認因為得到家人及廠商會同仁支持，所以都係決定參選。佢強調，廠商會內個個都係大老闆，個個都係叻人，最緊要大家團結、和諧同埋開心，仲話團結就係力量喎！
八卦友就話，由於李秀恒及顏太嘅競爭太激烈，兩人暗中拉票令唔少會董左右為難，令到原本感情融洽嘅會董之間氣氛好詭異。於是有人出動Shirley堂兄全國政協常委陳永棋，齊齊游說Shirley重新考慮競選。Shirley仔細考慮後，都認同自己係第一副會長，出選係責無旁貸，所以喺得到家人支持之下，態度出現一百八十度改變，決定參選喇！
形勢扭轉 傳顏太棄選
咁有分量嘅人重新出嚟參選，成個形勢立即扭轉晒。聽聞顏太已決定棄選，轉而支持Shirley。不過李秀恒就似乎仍未放棄，對呢個突如其來嘅變化，似乎仍然需要時間去消化。
講起年初Shirley決定棄選，主因係去年佢嘅囝囝因為突發心律失常死亡綜合症（SADS）而離世，事出突然令Shirley心態大變，除咗想放多啲時間陪家人，仲成立咗個「遺傳性心律基金」，希望提升公眾對呢個病嘅關注。Shirley就話，佢會繼續推動SADS嘅工作，六月份將有個活動宣揚有關訊息，希望加強大家嘅預防意識。