政情：中環出更：「四娘教子」 防長毛訪滬搞事
五十七位立法會議員將會喺今個星期六、日去上海考察。雖然中央同建制派已經釋出善意，逐一處理泛民議員提出嘅各項訴求，不過泛民主派臨上去前兩日仍然要求多多，再加上有份參加嘅社民連梁國雄（長毛）表明到時一定會示威，搞到主席曾鈺成同負責籌備行程嘅秘書處，淨係諗計對付佢，搞到頭都大埋。
梁被安排與四女將同組
為咗對付長毛呢個滋事分子，秘書處特意安排佢同團長曾鈺成一組，方便時刻(目及)實佢，同組團員仲有蔣麗芸、陳婉嫻、葉劉淑儀及梁美芬等「巴辣女將」，似足「四娘教子」。加上組內一個泛民都冇，相信長毛想搞事都難，最多只可唱獨腳戲。除此之外，秘書處亦刻意分開泛民同黨嘅議員，以減低佢哋嘅戰鬥力。
講番尋日茶會，民主黨單仲偕好失望，話曾鈺成喺大前日已經向泛民作出溫馨提示，話到時建制派會自動消失，令中央同泛民有單獨見面嘅機會。但係尋日就冇再有更多詳情，單仲偕話，泛民都會繼續參加，如果上到去發現貨不對辦，下次就唔使再預佢哋喎！
卓妮