政情:中環出更:逸夫書院籌款夜盧偉國夫唱婦隨

早前中文大學逸夫書院舉行粵曲籌款晚會,好唱得嘅立法會議員盧偉國(WK)與前馬會主席陳祖澤(John)都去一展歌喉。WK同太太黃少珍拍住合唱諧趣粵曲《綽頭王》,帶動全場歡樂氣氛。逸夫書院院長陳志輝(Andrew)都唱埋一份,但係出台前幾日因感冒菌來襲,突然失聲,好彩服用中藥加上充足休息,三日極速恢復八成功力,總算冇失場。

院長失聲 有驚無險

籌款晚會由逸夫書院與音樂系粵劇研究計劃合辦,Andrew搵來阿John合唱一曲《合兵破曹》,兩位都係資深唱將,歌齡長達廿年,出台前夾番兩次就搞掂。

Andrew當晚獻唱,觀眾都唔多覺佢把聲有咩問題。Andrew就抹一把汗,頻呼好險。

阿John近年致力推廣英文粵曲,前晚大唱中文粵曲一樣駕輕就熟。佢話秘訣係每星期堅持練歌,仲要謹記出台前三日戒食煎炸及辣嘢。阿John仲自爆曾有唔少蝦碌經歷,有次表演英文粵曲時着住對鞋太高,拗柴失平衡,幸好拍檔快手扶住,先至冇跌低出醜咋!

WK咁唱得,事關佢自細學聲樂,早已掌握用丹田唱歌竅門,中氣十足,八十年代又跟過王粵生學唱粵曲七年,所以練得一把好聲。盧太來頭都唔細,佢唱開女高音,曾係中大合唱團成員,上台與老公一唱一和,勁啱key。WK唔只唱得,仲精通口琴、琵琶、二胡、色士風及秦琴等,認真唔講得笑。

卓妮

第一手消息請下載on.cc東網iPhone/iPad/Android/Windows Phone Apps