政情：「打邊爐爭普選」 梁金成縮沙
喺中環滙豐總行舉行嘅泛民主派絕食行動已經進入第十一日，絕食者只剩下民主黨立法會議員胡志偉、尹兆堅、工黨林祖明同埋郭紹傑四人。「驅蝗行動」召集人梁金成（網名金金大師）原本計劃尋晚拉大隊去滙豐搞「打邊爐爭普選」行動，實行用「雞蛋滾豬腸」對抗泛民嘅「雞蛋抗高牆」。不過，喺活動開始前，金金大師突然褪呔取消計畫，驚落雨整熄個爐喎！
取消挑機賴天雨
金金大師解釋，原本佢哋已經準備好打邊爐用具，諗住按原定計劃去「挑機」，點知人算不如天算，尋日嗰天一直落雨無停過，加上愈嚟愈大風，佢哋擔心喺天雨下打邊爐會出現危險，於是決定忍痛取消今次行動。
聽到金金大師決定唔嚟打邊爐，民主黨總幹事林卓廷（阿廷）即時喺社交網站寸爆對方臨陣退縮，又恥笑佢哋落雨就唔爭普選，簡直係無膽匪類。為咗鼓勵對方一齊去滙豐爭取普選，阿廷甚至話，大會可以借帳篷畀佢哋打邊爐，又話改今晚去踩場都無問題，佢哋一定會在場恭候喎。