新聞統籌專員馮煒光嘅「三個字」金句成為政界笑料，估唔到一向精明嘅新任申訴專員劉燕卿(Connie)竟然步佢後塵。Connie尋日接受電台訪問時，被問到無喺政府工作經驗，可唔可以勝任申訴專員一職，Connie口快快咁話:「可以講，三個字，我無包袱。」咦！明明係四個字喎，Connie今次真係老貓燒鬚囉！
曾經喺消費者委員會工作卅八年嘅Connie獲委任申訴專員，難免惹來一啲質疑嘅聲音。Connie其實係想話，正因為佢無喺政府工作，唔會有「積非成是」嘅想法，就算調查時遇到相熟嘅部門首長都一樣無情講。佢形容，消委會同申訴專員公署嘅工作都係處理市民投訴，只係申訴專員涉及嘅範圍較大，涵蓋各個政府部門同廿四個公共機構，較有挑戰性，而消委會嘅核心價值係公平公開公正，佢會繼續以呢個信念擔任申訴專員。
Connie又話，公署過去幾年收到嘅投訴略有增加，過去一年就有五千五百幾宗投訴，同埋一萬二千幾項諮詢，未來唔排除增加人手。