政情：KK唔怕香港複製台學運
台灣反對簽訂兩岸服務貿易協議事件近排備受關注，學生佔據立法院已超過兩個星期，部分本港學生上周亦參與聲援行動。香港廣東社團總會主席王國強（KK）就話唔擔心香港會出現類似台灣學運，因為香港同台灣嘅情況唔一樣，好多台灣大學生同政黨嘅關係比較密切，亦較複雜，本港大部分嘅學生同政黨嘅聯繫相對較少，所以出現同類情況嘅機會比較低。
稱港生動機較單純
KK又話，香港同台灣大學生同樣都好關心時事，不過好似台灣反服貿示威期間學生衝擊行政院呢一類行動，背後其實需要好強嘅組織力加上政黨支持，本地學生與政黨有聯繫嘅為數唔多，因此示威動機亦較單純，所以唔驚佢哋仿效台灣學生。佢仲話發表意見係好事，只要避免流血衝突嘅話，其實遊行都可以係非常理性。不過講到佔中，KK就話好難想像可以完全冇衝突喇，所以最好都係避免啦！