政情：商界孖寶換味濃
本港傳統四大商會一直有立法會議員代表，其中代表香港總商會嘅林健鋒（Jeffrey）同代表工業總會嘅梁君彥(Andrew)，唔經唔覺已經做咗三屆，到二○一六年屆滿就足足做咗十二年議員。據聞唔少人對呢兩個議席虎視眈眈，認為兩人任期夠晒長，應該換人上位。距離下屆立法會選舉仲有兩年，正所謂「長江後浪推前浪」，唔知林、梁能否力挽狂瀾呢？
Andrew同Jeffrey呢對工商界孖寶，當年同樣係自由黨出身，○四年齊齊循功能組別進身立法會，Andrew接替丁午壽，Jeffrey就接田北俊棒。兩兄弟一向感情要好，○八年仲聯袂退出自由黨另起爐灶。經過多年政壇歷練，Andrew現時已係立法會內務委員會主席，係立法會第二把交椅，Jeffrey就身兼行政會議成員，兩兄弟都爬上權力頂峰。
工總新人等上位
不過有傳工總中人對Andrew長期霸住個議席有微言，盛傳工總副主席兼深水埗區議會主席郭振華就有意一試。支持郭振華一方認為佢喺工總貢獻良多，又有番咁上下資歷，代表工總做立法會議員勝任有餘。不過亦有工總高層撐Andrew，認為佢過去咁多年都做得幾好，除非有重大錯失，否則無端端都未必換人。
總商會變數仍多
Jeffrey亦面對挑戰，總商會現時仍以外資為最大勢力，華資只係商會內嘅少數，所以一直有傳聞指中央有意培育紅色商家出任總商會立法會議員，其中裕華國貨後人余鵬春就係其中一位熱門人選，究竟最終邊個跑出有排都未知，不過總商會主席一職聽聞已經塵埃落定，預料六月換屆時，現任主席周松崗會退下火線，由常務副主席彭耀佳（阿彭）頂上。
睇番田北俊同丁午壽嘅任期，都只係做咗兩屆功能組別議員，之後一係轉戰直選，一係淡出政界。但林梁孖寶現時已經做緊第三屆議員，確係耐咗啲。佢哋能唔能夠繼續打破紀錄，做足四屆功能組別議員？好戲在後頭。