中環出更：馬逢國識潮語 睇得明《紅Van》
體育、演藝、文化及出版界立法會代表馬逢國早前出席國際電影節活動，竟然自爆呢兩年都冇再訂電影節門票入場睇戲，對上一次睇戲已經係半年前睇《狂舞派》。雖然佢甚少入戲院，但事先張揚會睇由陳果執導、講《紅Van》嘅電影。呢齣戲由網絡小說改編而成，充斥大量「潮語」，到底馬逢國明唔明入面講咩o架？
會留意網民留言
馬逢國就話，自己有時會去網上討論區睇吓網民留言，覺得自己都算「幾潮」，會聽得明戲中主角講緊乜喎！佢又話，電影發展局有份資助呢齣戲嘅拍攝工作，佢身為電影發展局主席，點都要買飛入場支持吓嘅。
講番國際電影節，馬逢國大嘆早幾年都有預訂國際電影節門票，仲要訂足十幾場咁多，但唔知點解到咗放映當日，佢一定會因為有其他工作而去唔到睇戲，要臨急臨忙讓咗張門票畀人。自從試過多次睇唔成戲後，佢都唔敢再事先訂票，只係會去到戲院即場買門票算數。
卓妮