中環出更：高永文做獸醫？OKo架！
唔少人都鍾意養寵物，食物及衞生局局長高永文同埋副局長陳肇始（Sophia）尋日出席活動時，不約而同講起呢個話題。病到七彩嘅高永文見到一班狗仔即刻笑到四萬咁口，唔止上前撩狗仔玩，仲即席示範令狗狗「冧爆」嘅秘技。高醫生打趣話，如果佢唔做骨科醫生做獸醫，可能都沒問題喎！
話說高永文出席活動時，原本病到冇嚟神氣，但係見到狗仔就精神為之一振，用雙手不停按摩狗仔嘅面珠登。但見小狗流露出好享受嘅神情，原本眼仔碌碌好精靈，點知冇耐就舒服到瞇埋雙眼瞓着咗。高永文好得戚話，自己以前養過貓，所以好熟動物脾性。咁佢如果當初唔揀做骨醫，而做獸醫咪一樣好掂？高醫生唔客氣話：「可能都OK架！」
陳肇始輕鬆攞起蜥蜴
另一邊廂，Sophia出席兩棲及爬蟲協會活動時，佢即場攞起鬆獅蜥蜴，一啲都唔怕，睇嚟都係養過寵物之人。Sophia話，佢曾經養過狗，狗對主人好忠心，好似佢返屋企時，狗仔會即刻撲埋嚟，又會同佢傾偈，十足十人一樣，氹到主人好開心。不過兩年前屋企隻西施狗過咗身，Sophia想養番一隻，但係到依家都仲未搵到啱眼緣嘅狗喎！
同場嘅立法會議員陳克勤一到場就捧起全場最大、重四十磅嘅九歲蘇卡達象龜，克勤早排喺立法會係咁追問康文署全港公園有幾多隻龜，夠晒騎呢。佢解畫話，好多人鍾意將烏龜放生喺公園或者私人屋苑水池，其實係好心做壞事，因為好多烏龜習慣被人飼養，放生後反而唔適應，幾隻龜放埋一齊仲弊，佢哋隨時會自相殘殺，或者明明係淡水龜但就放咗落鹹水，總之放生等於放死，所以想喚起大家關注喎！
卓妮