政情：公民講場：二百年一遇 渠署「雨」出驚人

星期日本港多處地區突然落暴雨，有商場更變成「水簾洞」，當時渠務署署長鍾錦華就形容呢場暴雨係「二百年一遇」，市民聽到都覺得好誇張。渠務署助理署長麥嘉為尋日就喺電台節目幫署長補飛，話渠務署係量度每小時雨量嘅強度，而天文台就係計算雨量嘅深度，仲話二百年一遇只係機率問題，即係有二百分之一機會遇上暴雨，唔係等於二百年先有一次暴雨喎。