政情：跨性別平權 慢必激辯梁美芬
出櫃後積極爭取跨性別人士平權嘅立法會議員陳志全（慢必），尋日喺立法會財務委員會特別會議中，再就跨性別問題，同早前已反對立法保障跨性別人士嘅議員梁美芬激辯。慢必問政府，點解同纏擾法相比，當局用少一半資源去研究性小眾歧視問題。慢必仲就今年初有基督教學校涉嫌禁止教師係跨性別人士嘅事件，問政府有關學校係咪都要遵守《消除性傾向歧視僱傭實務守則》。
政制及內地事務局局長譚志源平淡咁回應話，會呼籲各界按《消除性傾向歧視僱傭實務守則》而行。唔知梁美芬係咪嫌政府嘅回覆太簡單，輪到佢發言時，就連珠炮發咁不點名回應慢必，話間學校已講明自己係基督教啦，梗係對教師嘅道德標準有要求，以及希望教師同學校辦學理念一致，質疑有人製造白色恐怖，仲話未立法已經係咁，立咗法都唔知會點算咁話。
意見一面倒 梁想退小組
梁美芬仲批評，消除歧視性小眾諮詢小組嘅意見好one-sided（一面倒），又話自已好frustrated（沮喪），究竟係咪應該繼續參加個諮詢小組喎。既然佢覺得小組嘅意見一面倒，走咗咪更加一面倒？