尋日係愚人節，搞D100網台嘅鄭經翰突然喺社交網絡同D100網台上聲稱想封咪，起初大家聽到都係得啖笑，殊不知鄭經翰今次話唔係講笑，不過再講講吓，佢疑似「露底」，大談目前網台面對資金不足，經營困難等問題，莫非佢嗌「封咪」係想為網台「撲水」？
鄭經翰尋日中午喺節目一開始就話，自己早前出席另一電台節目做嘉賓，諗起自己當年受襲，覺得非常感觸，最近又有前電台節目主持人李慧玲被解僱等事件，形容十年過去後大家仍然唔警覺，當年更有人幸災樂禍，覺得佢被襲係因為佢個人問題，令佢意興闌珊咁話。
鄭經翰講「封咪」講到理由多多，但講多陣就自動波提到網台嘅財政狀況，自言雖然網台開支微不足道，但以佢哋目前約五十萬聽眾之中，只有唔夠百分之三嘅人付費支持，實在唔足以維持網台營運。
佢其後更宣布由本月十五日起，喺網站重溫同下載節目需要收費，而手機應用程式亦會稍後跟隨，如果五月份收入仍未達標，更會考慮由某些節目改喺非免費頻道廣播，難怪有人笑言鄭經翰講「封咪」係配角，講莫財先係主角？