政情：新民黨拆港島公文袋

熟悉新民黨主席葉劉淑儀嘅人就會記得，當年佢因為廿三條敗走後，隨即赴美留學深造，之後回流返港，第一時間就喺海怡設立匯賢智庫辦事處。但多年來一直未贏得議席，令葉太耿耿於懷，所以今次海怡西補選勝出，據聞葉太不單止有成功報仇之感，仲燃燒起佢旺盛鬥心。

據說該黨經過今次選舉後，開始集中火力放喺明年區議會選舉，由於有關方面樂見該黨受中產選民支持，加上自由黨與建制派愈走愈遠，於是決定交由新民黨肩負重任，剿滅公文袋喺港島區嘅剩餘勢力。

由於公文袋喺港島區得番三個區議會議席，當中黎志強選區屬基層選區，較難硬撼，新民黨惟有將人力物力集中奪取康山、康怡兩大中產選區，現時該黨正物色合適人選攻堅，假如一次攻下港島區兩大中產區域，對該黨嘅立法會選舉部署將無往而不利。

港島南區亦係新民黨目標之一，但暫時情況唔係太樂觀，例如薄扶林選區，葉太一直想報當年陳岳鵬一戰之仇，奈何當區區議員司馬文戰鬥力強橫，而且當區外籍人士眾多，該黨難以挑戰，只能寄望其他選區。

擬收納獨立建制議員

除咗部署選戰，最好當然係不戰而勝，所以該黨將繼續喺港島區招兵，收納部分建制派獨立議員加入，但因為部分建制派獨立議員沒有自由意志，要聽命有關方面，所以部分收納行動至今仍未成事。俗語話「針無兩頭利」，做得建制派，好多時都係要靠番建制派，唔係你想點就點嘅。