中環出更：冇雨都擔遮 貪曾怕冰雹？
冬去春來，呢幾日天氣零舍唔穩定，周日晚更一度黑雨、冰雹雙料襲港，惹來堪輿學家揣測民間或有冤情，所以做得虧心事多嘅人自然騰騰震。任內牽涉連串貪腐醜聞但至今仍未「落鑊」嘅「貪曾」前特首曾蔭權爵士，尋日如常現身跑馬地聖瑪加利大堂，但冇雨之下仍要同行G4（警方保護要人組）人員幫佢擔遮，唔通係擔心天降冰雹？抑或貪曾唔見得光呢？
勞煩G4 擋不住鏡頭
尋日朝早七點十五分，貪曾如常乘座駕離開淺水灣豪宅去教堂望彌撒，抵達後逗留大約半個鐘就急急腳鬆人。不過，貪曾離開嗰陣寧願搭升降機都唔肯行樓梯落樓懶過鬼，而且當時雖則天陰陰但其實一滴雨都冇，但貪曾依然堅持要求同行G4人員幫佢擔遮，期間警員仲好識做咁試圖用把遮擋住鏡頭視線護主。可惜百密一疏，另一鏡頭從後見到貪曾喺遮下笑騎騎咁行上車。
不過，奉勸貪曾咪笑得咁開心，佢任內貪盡海陸空、歎盡省港澳，施政遺禍新一屆政府，搞到天怒人怨，就算依家日日祈禱懺悔都冇用，擔遮都擋唔到天降冰雹。
卓妮