中環出更：施榮恆接棒東華父贈墨寶
東華三院董事局尋日換屆，福建幫頭領兼書法家施子清公子施榮恆（Ivan）接棒做主席，施家上下總動員出動捧場。Ivan最恨收到嘅賀禮，係爸爸親筆提字嘅墨寶，佢笑言已向爸爸「求字」，但未獲答覆，尋日喺就職禮後再表誠意，終於打動爸爸答應送上「擇善求真」四個字，仲答應日內「起貨」。Ivan打算把墨寶放在東華三院主席辦公室，為東華同事加油。
新主席上場，Ivan主動送大禮，就係「體貼卡片」及紅色會呔。原來新卡片印有各董事局成員個靚樣，方便「認人」，又加入QR Code（二維條碼），等朋友可以即時將卡片資料儲入手提電話，啱晒乜都要快嘅香港人。至於會呔，就由升呢做副主席嘅王賢誌揸Fit，貪佢打扮最潮喎。
陳祖恒做老竇 雙喜臨門
至於新任副主席陳祖恒（Sunny）可謂雙喜臨門，太太Esther為佢誕下首名BB，兒子五星期大，取名陳忠孝，B仔出世重八磅幾，Esther笑言嚇咗一跳。今屆董事局新總理有唔少名人之後，包括前東華三院主席李三元大仔李曠怡、廖創興家族後人廖偉麟（Jeffrey），以及前東華總理曾楊淑貞公子曾慶業等。
Jeffrey家姐廖偉芬為弟弟送上深藍色愛心冷衫，繡上對方名字及祝福語句。廖偉芬話，已故父親廖烈正亦曾擔任善團總理，如今弟弟當上東華三院總理，彷彿將爸爸的愛心延續，好值得紀念。
卓妮