立法會每隔幾個月都會宴請各國駐港總領事，唔少議員亦畀面出席趁機「勾結」外國勢力。不過，尋日有議員因為領事一個疑惑而爭論，令午宴火藥味甚濃，但「罪魁禍首」、去年被踢爆月租七十二萬元超級豪宅嘅英國駐港總領事吳若蘭（Caroline Wilson）就死撐唔出聲，寧願做塘邊鶴睇戲，為呢場午宴火上加油。
話說阿根廷總領事對立法會仍存在功能界別相當好奇，同枱嘅飲食界議員張宇人（Tommy）當然盡「地主之誼」，引用數據硬銷呢個制度適合香港，呼籲其他國家多多學習添！一直爭取取消功能界別嘅陳偉業當然唔忿氣反駁啦，搞到餐飯食食吓出現燶味。
其實講到尾，功能界別都係拜港英殖民政府所賜，唔係港英政府喺八十年代立法，首次引入第一批功能界別議員，香港都唔會存在功能界別嘅問題。據聞同枱嘅吳若蘭繼續貫徹來港後嘅封口政策，全程唔出聲，莫非佢驚喺呢個政改諮詢敏感時刻講多錯多？