中環出更：馬豪輝太太幸福「煮」意
好多人話想留住一個男人嘅心，就要先留住佢個胃，雖然呢個講法唔係人人認同，但煮得一手好菜的確可以令身邊人覺得好幸福。港區全國人大代表馬豪輝太太馬廖千睿（Elaine），烹飪不但係佢嘅日常興趣，仲令佢同囡囡之間有更親密和融洽嘅關係。最近Elaine用自己嘅落廚心得撰寫咗本烹飪書，將各種傳統菜式及甜品食譜傳授畀天下女兒，並將收益撥捐畀兒童癌病基金及脊髓肌肉萎縮症慈善基金。
母女愛烹飪更親近
話說Elaine同囡囡都好鍾意烹飪，兩母女平日唔只會一齊去各國學整甜品，仲會互相鑽研廚藝，囡囡仲特地請咗兩日假幫媽咪本新書做校對添，可以話廚藝將佢哋母女關係拉得更近。
今次Elaine本新食譜有好多相片都係以婚嫁為主題，好似變成囡囡嘅嫁妝咁，將自己同奶奶身上學番嚟嘅珍貴手藝代代相傳畀囡囡，入面嘅菜式經佢悉心挑選，全部快靚正兼易煮，方便時下事業女性放工後快手煮番餐。
卓妮