政情：新政助「無殼」 陳茂波最安樂
曾自言冇物業、冇地同冇感情缺失嘅新任發展局政治助理馮英倫，其利益申報日前曝光，一如佢自己話齋，申報內容冇擁有任何樓宇或土地記錄，唯一就係申報自己係菁英會等三個組織成員。馮英倫接受查詢時話，依家佢同屋企人一齊住，所以無擁有或租借任何物業，不過佢都有揸車出入代步。馮英倫身家清白，身為佢上司嘅發展局局長陳茂波相信都安樂晒嘞。
身家清白 唔怕「衝突」
此話何解？咪因為發展局工作無遠弗屆囉，只要漏報是旦一項潛在利益，就會捲入利益衝突疑雲。就以發展局局長陳茂波為例，去年推展新界東北發展計劃時，其家人曾捲入囤地風波，最終要數度解畫先可以平息；而時任發展局政助何建宗，更因涉嫌漏報家族資產，最終喺事發後極速辭職。有政界中人話，馮英倫呢個「無殼政助」加入政府，就咁睇佢嘅申報身家清白，官場中人特別係陳茂波，暫時可望鬆一口氣吧。