政情：激進泛民 打邊爐爭普選
面係人哋畀，架係自己丟，泛民再次證實呢個老掉牙嘅真理。早前一批溫和泛民決定新一輪抗爭行動，提出以無限期絕食，希望藉此顯示爭普選決心。之不過絕食呢招好似時光倒流二十年咁老套，一早被左中右嘅政界中人嘲笑，但呢批溫和泛民仍然樂此不疲絕食，終於惹起激進泛民支持者不滿。尋日一班激進網民發起「打邊爐爭普選」，決定一直食到食唔到為止，藉此寸爆溫和泛民食老本毫無新意。連泛民自己友都要「另起爐灶」搞對抗，係咪證明咗絕食呢招得唔到普遍市民支持？
狂食都係展現意志力
今次打邊爐爭普選，由「驅蝗行動」召集人梁金成（網名金金大師）發起，佢話眼見泛民唔生性，明明有談判籌碼都唔識用，一味搞埋絕食呢啲無用抗爭。佢尋日話既然絕食都可以爭取普選，咁打邊爐點解唔得呢？所以佢組織網民喺四月六日當晚，拉大隊去泛民絕食之處大搞「打邊爐爭普選」。
泛民聲言絕食係「雞蛋抗高牆」，用意志力表示爭普選決心。但金金大師就話，佢哋打邊爐係「雞蛋滾豬腸」，話打邊爐食到好飽時仲要繼續撐，不停咁食嘢落肚，某程度都係展現驚人意志力嘅一種方式，所以先用呢招對抗泛民絕食。聽聞班網民連口號都諗埋，就係「同心打邊爐、民主會戰勝歸來」。
諷刺溫和派不思進取
似乎唔少網民都不滿泛民只識絕食一招，金金大師喺社交網站拋出建議後，短短兩三個鐘已有七十幾人話會出席打邊爐，仲有人講笑話，既然「佔領中環」咁鍾意演練，不如即晚就先去打邊爐「演練」下啦。金金大師近期搞得社運多，佢話預咗參加嘅網民得十幾位，但佢講得出就唔會「走數」，認為今次行動人數多寡唔重要，目的係以輕鬆手法諷刺泛民不思進取。有網民仲建議用炭火打邊爐，一來火力夠猛，二來用剩啲炭可以畀埋隔籬班泛民喎。至於用嚟做乜，就畀少少想像空間大家啦。
為防止被人話有破壞無建設，金金大師建議泛民直接喺香港同中央官員傾政改，一來唔使浪費公帑買機票訂酒店，二來泛民對三軌方案有晒共識，點解仲要北上傾？咁講法又唔係無道理，睇怕今次泛民絕食加上海之行，都係失多過得。