中環出更：巾幗勝鬚眉 行會勢女權當道？
沙田馬場尋日飄來一陣學術氣息，事關其中一場賽事係香港中文大學校友會聯會盃，一班中大校友一早就聚集馬會廂房為賽事打氣。卓妮見到行政會議成員張志剛喺度，佢仲係一九八○年第一屆嘅人類學學生添！佢話讀大學嘅時候男仔數量比較多，但依家就唔同晒，女仔都好叻，唔只文科，連醫科都係女仔多，仲話第時連行會都可能無可避免會變成女權當道。
張志剛用人類學預測
話說張志剛當時本來想報讀經濟，但點知面試時被指數學一般，中大於是提議佢讀新開嘅人類學，因此佢誤打誤撞就成為咗中大第一屆人類學嘅學生。既然係讀人類學，張志剛梗係要拋吓書包，以人類學分析點解會有女仔愈來愈叻呢個現象啦。佢嘅解釋係，大部分女仔都比較早熟，所以喺小學階段讀書成績比較好，因而有較大機會進入較出色嘅中學和大學，接受更好嘅教育。
佢仲話除咗讀書外，依家去到邊都有出色嘅女士，好似行政會議成員咁，目前有六位女士，第日一定會愈來愈多，行會分分鐘都會成為女士嘅天下。
佢有感而發可以理解，因為佢屋企三個小朋友，全部都係女。
卓妮