政情：公民講場：西九謀「發水」？ 慳番啖口水！

西九文化管理局行政總裁連納智尋日帶隊到立法會，交代向城市規劃委員會申請放寬西九文化區總樓面面積及高度限制，建議放寬總樓面面積百分之十五，由現時的七十四萬平方米增加至八十五萬平方米，建築物高度則增加五至十四米不等。西九文化管理局提出咁嘅建議，無非都係想搵多啲錢幫西九發展填氹啫，結果被議員狠批此舉有違當初搞文化嘅原意。而民政事務局常任秘書長楊立門就好老實話，即使提高發展密度，亦未必可以解決西九的財政問題。睇嚟連納智都係慳番啖氣暖肚好過喇。