政情：同男友嗌交 遊日「彌」補關係
人民力量主席袁彌明（Erica）苦戰三個月，上星期成功喺南區區議會海怡西選區補選中，以逾千票重挫民主黨「老鴿」單仲偕排名第二。公布結果一刻，Erica喜極而泣仲同男友林雨陽抱頭痛哭。不過，原來二人備戰參選期間一度狂吵大鑊，即使同一屋簷下都要隔住房門嗌交。為咗選舉，輸咗男友當然無謂，所以Erica今日會偕男友飛赴北海道滑雪，享受二人世界。
除咗因為選舉而嘈交，Erica早前接拍嘅一部微電影，由於其中一場戲講述Erica為男主角掃背，仲有親吻鏡頭，激到男友打爛醋埕，所以呢趟北海道之旅真係來得及時，可以趁機修補關係。
劉嗡疑似出戰南豐補選
講開補選，東區區議會南豐選區亦因為民主黨原區議員梁淑楨嚴重中風而出現議席空缺，早前放風有意出戰嘅人力繼續大賣關子，聲稱下月落區宣傳公民提名，到時睇吓街坊反應再作決定喎。據知「劉嗡」劉嘉鴻會落場，唔知「真命天子」係咪就係佢呢？無論如何，有人力嘅地方，班白鴿就頭痕喇。