近日有唔少建制派人士，包括立法會議員同一啲內地「護法」都先後提到《基本法》第二十三條立法嘅問題。但原來幾年前已有鷹派嘅親中人士喺北京建議過將中國《國家安全法》第三章加入《基本法》附件入面，直至香港廿三條立法喎。其實呢個方法喺技術上的確可行，只係唔知會有咩效果，所以有親中人士就話，如果真係要行到呢一步，倒不如就廿三條立法做諮詢啦！
港府自從○三年提出廿三條立法並遇到社會強烈反對之後，就一直冇提過立法嘅事。有親中人士就透露，只係因為北京認為時機未到，擔心強行立法會適得其反，甚至影響香港國際金融中心地位。
不過，由於激進泛民主派不時會邀請台獨分子來港授課，若香港未來出現如同台灣佔領立法院嘅情況，萬一佔領立法會、政府總部，又或危害國家主權嘅運動，就一定會觸動到中央嘅神經，屆時可能成為中央認為要廿三條立法嘅好時機。