政情：泛民吊高嚟賣玩殘維安
全體立法會議員日前獲中央邀請前往上海訪問兩日一夜，期間除咗參觀當地交通基建外，仲有機會同中央官員會面，以及討論鬧得熱烘烘嘅政改問題。雖然成個團堪稱為泛民主派議員度身訂造，但泛民至今依然扭扭擰擰唔肯表態係咪參加，一時話唔去，一時又話要睇真啲先，完全係吊高嚟賣，玩殘一班幫佢哋訂機票同酒店嘅秘書處職員。
立法會內務委員會尋日再次討論訪問上海之行，泛民議員繼續重申要有足夠時間同中央官員單獨討論政改問題，否則唔好怪佢哋杯葛訪問團。明明話咗唔會去嘅新民主同盟范國威所關心嘅，竟然係傳媒可唔可以全程錄音錄影，同埋議員有冇機會召開記者會，等港人知道會面內容。真係唔知佢係上去傾政改吖，定係一心想出風頭呢？
議員搵「無聊」藉口
秘書長陳維安（Kenneth）回覆話，具體採訪安排要同上海市政府商討，一般而言傳媒係可以隨團採訪。解答完呢條問題，又輪到白鴿黨黃碧雲大彈訪問行程細節內容粗疏，又質疑點解議員要同內地港人聚餐，覺得食飯呢個行程好無聊咁話。佢又批評秘書處要佢哋喺下周一之前回覆係咪參加訪問團，但中央又唔回覆會唔會單獨接見佢哋，話要畀多幾日先至決定到去唔去喎。
相反社民連梁國雄（長毛）就老實得多，話自己之所以會忍痛訂機票去上海，係要上去「直斥」一眾中央官員，又問秘書處會唔會為佢安排呢個機會，等佢可以「柄官員一鑊」。Kenneth又解釋，秘書處係受制於航空公司機位訂位安排，所以先會定出下周一呢個死線。為咗安撫嗰班唔知自己想點嘅泛民議員，秘書處都可以容許議員喺限期後更改決定，但價錢可能就要貴少少嘞。
最後唔去等同撻訂
雖然Kenneth會上咁講，但據聞秘書處為咗應付嗰班一時一樣嘅泛民議員，已經定出一套應變策略，就係事先同航空公司預留八十個機位，就算有議員喺最後一刻先決定隨團，揸住證件都可以即時上機。不過，據聞留位要每人五百元，如果最後唔要個位就等同撻訂，要喺議員外訪開支中扣除。話時話，班議員今次上去都係嘥錢居多，唔去慳番筆公帑仲為市民做番件好事。