中環出更：孫公現身理大 帶人「遊花園」
教育局前局長孫明揚（孫公）自從前年退休後一直「潛水」休養生息，不問政事亦少見出席公開活動。孫公尋日罕有現身，到理工大學主持退休後首個公開座談會，題為「量子力學與政治：退休資深公務員的分享」。不過，孫公今次現身不但再帶大家遊花園，講嘢仲好「禪」。
用量子力學講政治
孫公引用量子力學經典實驗「薛定諤的貓」（Schrödinger's cat）作為引子，回顧當年時任政制事務局（現為政制及內地事務局）局長嗰陣，被記者問到對《基本法》附件有關對選舉委員會嘅演繹。由於當時社會未有定論，孫公點答都錯，所以惟有帶記者遊花園。卓妮對量子力學唔熟悉，孫公呢番引言，簡直帶咗卓妮遊外太空。
不過，孫公最後都回歸正傳，自言對香港前途好樂觀，所謂「條條大路通羅馬」，但寄語大家知足常樂，「喺適當時間、以適當方法做適當嘅事」。唔知孫公係咪意有所指呢？
原來，孫公唔只鍾意耍太極，仲鍾意落街買餸。全程陪坐嘅孫太向卓妮透露，孫公退休後要定期洗腎，所以冇得離港旅遊，最多睇吓書、歎吓下午茶，最近仲鍾意落街市買餸，然後交畀佢下廚添！
卓妮