中環出更：「香港好品牌」北上搵人仔
珠三角工資水平暴升，港商叫苦連天，開廠利潤減少，商家紛紛自創品牌攻入神州。「假髮大王」趙振國、鐘錶界黃業光與珠寶設計師陳曼芝，近日牽頭組成「香港品牌總商會」，呼籲港商自強，打造「香港好品牌」。趙振國直言，對開創品牌係「零經驗」，心知燒咗銀紙隨時得個吉，但眼見製造假髮嘅毛利已成「雞肋」，如果公司嘅大腦再唔革新，五年後一定執笠，所以下定決心轉型。
白髮蒼蒼嘅趙振國，決定重返校園，學打造品牌嘅竅門。近日聯同一班港商組成香港品牌總商會，並擔任會長一職，積極打通內地「經脈」。
港商齊心搞自創
陳曼芝都加入做副會長，佢坦言進軍神州有危亦有機，盲目亂打亂撞，等同燒銀紙：「雖然好多港商有品牌，但礙於資金有限，宣傳少，與其單打獨鬥，不如團結起來向內地商場租舖，傾位置同租金都會易好多。」
陳曼芝月前連同黃業光帶隊考察上海及蘇州睇舖位，又計劃拍攝多集節目，進攻神州家家戶戶。鐘錶老闆梁景就都加入自創品牌行列，佢直言明知打響名堂唔易，仍堅持去做。梁近年自創兩面都睇到時間嘅雙面手錶，成功衝出香港。
不過，開創品牌之路荊棘滿途，製衣廠老闆劉佩華慨嘆曾經交過唔少學費：「以往只顧每月狂推出新款式，以為咁就可以谷起品牌，依家明白貴精不貴多嘅道理，精心度一個有代表性嘅設計，顧客先會記得你。」
聽完佢哋咁講，創意工業真係極之唔容易喎。
卓妮