政情：肥彭臨走搞船P 似足貪曾
訪港五日嘅末代港督彭定康（肥彭）尋晚終於捨得返英國，但臨飛前又點會放過任何搞搞震嘅機會呢？在港冇乜朋友嘅肥彭，除咗搵番早兩日先見過面嘅「上海灘」創辦人鄧永鏘食晏外，下午仲一度「失蹤」兩個多小時，原來肥彭同佢嘅舊下屬「貪曾」前特首曾蔭權爵士一樣，都係鍾意坐豪華遊艇搞「船P」（船上派對）！
同李鵬飛密斟疑攪局
留港最後二十四小時嘅肥彭把握最後機會，中午先應鄧永鏘邀請，到灣仔參觀鄧有份投資嘅家品概念店，一行人之後轉到中國會開飯，肥彭期間再遇十幾個高舉港英旗嘅「龍友」撐場，仲帶埋書畀佢簽名。佢飯後再去中環碼頭，學貪曾坐豪華遊艇搞「船P」，座上客仲包括被指係「港英餘孽」嘅前行政及立法兩局議員李鵬飛夫婦添！肥彭同李鵬飛傾偈傾到上埋遊艇，究竟所為何事呢？
傾夠先肯上岸嘅肥彭，夜晚到酒店享用今次訪港嘅最後晚餐，晚上九點幾再喺鄧永鏘護送下走人，搭十一點幾起飛嘅夜機返英國，正式結束一連五日嘅搞搞震之旅。